Hacı Qalibin oğlunu kim həbs etdirib?
Featured

18 Sentyabr 2017

Milli Məclisin keçmiş deputatı, Qafqaz Müsəlmanları İdarəsinin rəhbəri Allahşükür Paşazadənin qudası Hacı Qalib Salahzadənin oğlu Əlihüseyn Salahzadə "Azərsu" ASC-nin nəzarətçisini döydüyünə görə həbs olunub.

Salahzadə Cinayət Məcəlləsinin 315.2 maddəsi ilə təqsirli bilinir.

Məlumatı Hacı Qalib Salahzadə təsdiqləyib. O, bildirib ki, oğlu sentyabrın 13-də gecə saatlarında Nəsimi rayon prokurorluğunun müstəntiqi Anar Abıyevin "qondarma qərarı" ilə həbs olunub. "Biz bu həbs qərarı ilə qəti razı deyilik və apellyasiya şikayəti vermişik"-Hacı Qalib deyib. O, oğlunun həbsini "sifarişli" adlandırıb.

Şeyxin qudası və keçmiş deputat bunları deyib: "Oğlum ağıllı, yerini bilən adamdır. Üç dəfə də Həcc ziyarətində olub. Sadəcə olaraq oğlumu şərləmək istəyirlər. Sentyabrın 4-də oğlum Əlihüseyn Salahzadə hamı kimi evində oturub Qurban Bayramını qeyd edirmiş. Həmin gün qapı döyülür, qapını açan zaman "Azərsu" ASC-nin əməkdaşı Elbəyi Mirzəliyev adlı şəxs oğlumun yoldaşını təhqir edir. Bunu görən kimi oğlum Elbəyinin çənəsinə sillə vurur. Yəni, oğlumun yerində kim olsaydı, eyni addımı atardı. Sonradan həmin Elbəyi oğluma qarşı şikayətini də geri götürüb, barışıblar və mətbuata da açıqlama verib. Bütün bunlara baxmayaraq, sentyabrın 13-də məhkəmə keçirilərək, oğlumu həbs ediblər. Hazırda da oğlum Kürdəxanı həbsxanasındadır".

Hacı Qalib bildirib ki, onun oğlunun həbs edilməsi Respublika prokuroru Zakir Qaralovun planı əsasında baş tutub. 28 dəfə həcc ziyarətində olan sabiq deputat bildirib ki, Zakir Qaralovun onunla düşmənçiliyinin tarixi 20 ildən çoxdur. 

Xatırladaq ki, Hacı Qalibin oğlunun "Azərsu" ASC-nin nəzarətçisi Elbəyi Mirzəliyevi döydüyü haqda mətbuata döyülən şəxsin qardaşı danışmışdı. O, bildirmişdi ki, hadisə nəzarətçinin Hacı Qalibin oğlunun yaşadığı evin suya görə yaranmış 70 manat borcunu ödəmək barədə xəbərdarlığından sonra baş verib. Keçmiş deputatın oğlu borcu istəyən nəzarətçiyə hücum edərək onu döyüb, xəsarət yetirib. Çənəsini iki yerdən sındırıb və bir dişini salıb. Şikayətçi deyirdi ki, hadisədən neçə gün keçməsinə baxmayaraq hüquq-mühafizə orqanları məsələni araşdırmır.

Top
JoomlaLock.com All4Share.net