Naxçıvana gedəcək İran vətəndaşları üçün viza rejimi ləğv edilib

27 Noyabr 2019

İran vətəndaşlarının Naxçıvan Muxtar Respublikasına girişi üçün birdəfəlik vizanın (15 gün müddətinə) ləğv edilməsi haqqında razılıq əldə olunub.

Bunu İranın Naxçıvan MR -dəki baş konsuluğu yayımladığı açıqlamada bildirib.

Məlumata görə, bu razılığın icrasına dekabr ayının 1-dən başlanılacaq. Həmin gündən İran vətəndaşları vizasız Naxçıvan MR-ə (15 gün müddətinə) səfər edə bilər.

Azərbaycanın digər bölgələrinə səfər etmək istəyən İran vətəndaşları 20 dollar ödəməklə viza almalıdır. İran vətəndaşları Azərbaycanın digər bölgələrinə səfər etmək üçün Naxçıvan hava limanından da viza ala bilər.

Qeyd edək ki, cari ilin oktyabr ayında Naxçıvan Muxtar Respublikasına səfər edən İran vətəndaşları üçün viza rüsumunun məbləği azaldılmışdı.

Culfa, Şahtaxtı, Sədərək sərhəd keçid məntəqələrində, Naxçıvan dəmiryolu stansiyası və Naxçıvan Beynəlxalq hava limanında İran vətəndaşları üçün 15 gün müddətli birdəfəlik viza rüsumunun məbləği 5 avroya (9.34 manat) endirilmişdi.

Top
JoomlaLock.com All4Share.net