Müsəlman Birliyi Hərəkatı BƏYANAT verdi
Featured

04 Aprel 2019

"Əziz həmvətənlər!

Bildiyiniz kimi iki həftədən artıqdır ki, Müsəlman Birliyi Hərəkatının üzvü Anar Cabbarov Bakı Mütəşəkkil Cinayətkarlıqla Mübarizə İdarəsində (BMCMİ) də qanunsuz olaraq saxlanılır.

Dünən aldığımız məlumata görə Anar Cabbarov saxta narkotik ittihamı ilə cinayət məsuliyyətinə cəlb olunaraq Bakı İstintaq Təcridxanasına göndərilib.

Məlum olduğu kimi Türkiyədə saxlanılan zaman Anar Cabbarovun üzərinə baxış keçirilib, üzərində qeyri qanuni heç bir şey aşkarlanmamış, sonradan Azərbaycana göndərilmişdir. Ölkəmizə gətirildikdən sonra A.Cabbarov bütün qanuni haqlarından məhrum edilmiş, ailəsi ilə telefon əlaqəsi saxlamasına, vəkilləri ilə görüşməsinə imkan verilməmişdir.
Bir müddət öncə Prezidentin imzaladığı sərəncamla həbsdən azad olan siyasi məhbusların sırasında bir qrup inanclı, o cümlədən MBH-nın üzvləri də yer almışdır. Bu addımdan sonra cəmiyyətdə digər günahsız həbsdə olanların tezliklə azadlığa çıxacağı ümüdü yaranmışdır. Lakin son günlər yenidən qanunsuz həbslərin başlaması, yenicə azadlığa çıxmış Bayram Məmmədovun inzibati, Anar Cabbarovun isə cinayət məsuliyyətinə cəlb olunması bütün gözləntiləri sual altına alır və təxribatçı qüvvələrin növbəti oyunundan xəbər verir.

Biz ölkəmizin bütün ziyalılarına, din xadimlərinə, ilahiyyatçı alimlərinə, müxalif təşkilatlara, ictimai xadimlərə, inanclı insanlarına, hətta iqtidarda olan vicdanlı insanlara bir sözlə bütün Azərbaycan xalqına bildiririk ki, Müsəlman Birliyi Hərəkatı heç bir halda qara qüvvələrin təxribatına getməyəcək, dövlətçiliyimizin inkişafı, xalqımızın tərəqqisi yolunda sivil mübarizəsini davam etdirəcəkdir.

Biz təşkilat olaraq qanunsuz həbsləri bir daha pisliyir, bunun ölkəmizin inkişafına heç bir xeyrinin olmadığını bildiririk. Zülm ilə abad olanın sonu bərbad olar deyimini bir daha zalımların yadına salırıq! "

MBH-nın idarə heyəti

04.04.2019

Top
JoomlaLock.com All4Share.net