"Reuters": Azərbaycan İraqda ən çox vətəndaşı həbs olunmuş ölkələrdəndir
Featured

01 May 2019

"Yalvarıram, bizə kömək edin, evimizə getmək istəyirəm..."
"Reuters" agentliyinin əməkdaşı İraqın paytaxtı Bağdadda Rusafa qadın həbsxanasında olub.

İslam Dövləti (İŞİD) terrorçu qruplaşmasına bağlı qadın və uşaqların taleyi müzakirə olunanda bu həbsxana diqqət mərkəzinə gəlir.

"Nə olar, evimizə getmək istəyirəm, bizə kömək edin. Burası bizim üçün yaxşı yer deyil",– azərbaycanlı bir qız müxbirə dil töküb. Jurnalist qızın 100-dək uşağın əhatəsində danışdığını yazır.

Bu qruplaşma 2014-cü ildə Suriya və İraqda böyük ərazilər ələ keçirib, kütləvi qətllər, işgəncə, cinsi köləlik gerçəkləşdirib. Bu səbəbdən indi bu həbsxanada qalanların həm təhlükəsizlik riski yaratdığı, həm də özlərinin qisas hədəfi ola biləcəyi düşünülür.

Həbsxananın adını çəkilməsini istəməyən direktoru isə deyib ki, ilk vaxtlar aramızda inam yaratmaq çətin idi. Hətta çoxu özlərini və uşaqlarını öldürməyə çalışırdılar. Bu həbsxanada şübhəli İŞİD döyüşçülərinin 1241 əcnəbi arvadı və uşağı saxlanır, onlar 12-dən artıq ölkəni təmsil edir. 774 nəfəri 9 aylıq-15 yaş arasındadır. Müharibənin çökdürdüyü İraqda maddi böhran yaşandığından rəsmi Bağdad məhkəmə qarşısına çıxarılmayanların öz ölkələrinə göndərilməsini istəyir. Ancaq bu, hüququ baxımdan mürəkkəb, siyasi "zəhərli" məsələ sayıldığından bir çox ölkələr həmin şəxslərin qəbulundan imtina edib".

"Bizə paltar, dərman gətirmisən? Doğrudan, bizə dərman lazımdır", – mavi hicablı azərbaycanlı qız deyib.

Həbsxana direktoru həmin qızın anasının ömürlük həbsə məhkum edildiyini deyir, o, İŞİD-ə üzv olub, İraqa qanunsuz gedib. Qız isə yaşı çatmadığından İraq qanunları ilə mühakimə oluna bilməz. Onun dəmir barmaqlılar arxasında nə qədər qalacağı bilinmir.

"Reuters" yazır ki, Azərbaycan İraqda ən çox vətəndaşı həbs olunmuş ölkələrdəndir, bu sırada Rusiya və Türkiyə də var. Ancaq agentlik Azərbaycanın XİN-dən İŞİD-ə bağlı uşaqların repatriasiya siyasətinə dair şərh ala bilmədiyini yazır. (virtualaz)

Top
JoomlaLock.com All4Share.net