Arzu Xanim

Arzu Xanim

Email: Bu email ünvanı spambotlardan qorunur. Onu görmək üçün JavaScripti qoşmaq lazımdır.
Çərşənbə, 11 Dekabr 2019 14:52

Talışların İctimai Şurası yaradılıb

Dekabr 7-də Bakıda Azərbaycan Talışlarının İctimai Şurası yaradılıb.

Bu barədə şuranın üzvü Mehdibəy Səfərov məlumat yayıb.

Azərbaycan Talışların İctimai Şurasının Azərbaycan Respublika ictimaiyyətinə müraciət ünvanlayıb.

Müraciətdə deyilir:

"Əziz həmvətənlər!

07 dekabr 2019-cü il tarixdə Azərbaycan Respublikasının köklü xalqlarından biri olan, talış xalqının bir qrup ictimai fəalı və ziyalısı bir yerə yığışaraq, Azərbaycan Talışların İctimai Şurasını (ATİŞ) təsis etdik.

Azərbaycan Talışların İctimai Şurasının fəaliyyətə başlaması mövcud tarixi zərurətdən meydana gəlmişdir. Məlumdur ki, Azərbaycan Respublikası tarixən, bir sıra xalqların, o cümlədən biz - talışların ANA VƏTƏNİdir. Təəssüf ki, bir xalq olaraq vətənimizdə Dövlətimiz olan Azərbaycan Respublikasının hökuməti tərəfindən lazımi diqqət və qayğıdan kənarda qalmışıq.

Keçən əsrin 30-cu illərində bədnam Stalin repressiyası ilə, adı büsbütün qadağan edilən talış xalqının reablitasiyası üçün ölkəmizin 30 illik müstəqillik dönəmində çox xırda nüanslar istisna olmaqla, ciddi bir iş görülmədi.

Azərbaycan Respublikası hökuməti Avropa Şurasına üzv olanda, üzərinə öhdəlik olaraq götürdüyü Regional və azlıqların dilləri haqqında Avropa Xartiyasına indiyə kimi qoşulmamışdır.

Azərbaycan Respublikasının ratifikasiya etdiyi Milli azlıqların hüquqlarının müdafiəsi haqqında Avropa Şurasının Çərçivə Sazişinin heç bir norması bu günə qədər talışlara münasibətdə realizə olunmamışdır.

Talış dilinin tədrisi, bu dil üzrə mütəxəsislərin hazırlanması, talış dilində radio və televiziya verlişlərinin təşkili, talış dilində mətbuatın dövlət büdcəsi hesabına maliyyələşməsi ilə bağlı, hökumətimizə etdiyimiz bütün müraciətlər cavabsız qalmışdır.

Bir sözlə, dövlətimiz olan Azərbaycan Respublikasının hökuməti ana dilimizə, tariximizə, adət-ənənələrimizə biganə qalmaqdadır. Bu biganəlik daha çox talışın bir xalq olaraq tez bir zamanda assimilə olunmasına xidmət təsirini bağışlayır.

Talış ziyalılarının öz ana dillərinin, mədəniyyətlərinin inkişafı, ictimai-siyasi birliklərin yaradılması ilə bağlı təşəbbüsləri qısqanclıqla və qərəzlə qarşılanır, bir çox hallarda isə belə təşəbbüslər təqib və təzyiqlə müşayət olunur.

Qədim tarixə və zəngin adət-ənənələrə malik olan talış xalqının milli varlığı tamamilə sıradan çıxmaq təhlükəsilə üz-üzə qalmışdır.

Talış bir xalq olaraq, tarixi vətənində yarım qadağa altındadır. Hökumətimiz öz xalqını tanımamaq xəttini götürüb. Belə vəziyyət normal hesab edilə bilməz. Etnomüxtəliflik assimlyasiyanı deyil, ölkəmizin multikultural zənginliyini, eləcə də xalqlarımızın inteqrasiyasını şərtləndirən başlıca amildir! Bu da ilk növbədə, qarşılıqlı tanınmadan və qarşılıqlı olaraq hüquqlarımıza hörmətdən keçir.

Azərbaycan Respublikası bizim hamımızın dövləti, ana vətənimizdir! Ona görə, Azərbaycan hökumətindən də gözləntilərmiz xalqımıza qarşı sivil münasibətin nümayiş etdirilməsilə bağlıdır. Məhz, belə bir situasiyanı formalaşdırmaq üçün, ATİŞ Azərbaycan Respublikası Konstitusiyasının 44, 45 və 58-ci maddələrini əsas götürərək, öz fəaliyyətinə başlamasını məmnuniyyətlə, ölkə ictimaiyyətinə bəyan edir.

Son zamanlar ölkəmizdə ictimai-siyasi sahədə aparılan islahatlar bizdə milli münasibət isteblişmentində də müsbət addımların atılacağına inam hissi yaradır. Ümidvarıq ki, bu addımımız ölkəmizin tərəqqipərvər, demokratik qüvvələri və vətəndaşları tərəfindən dəstəklənəcəkdir!

Fəaliyyətimiz Azərbaycanın dünyada müsbət tolerantlıq imicinin və dövlətçilik ənənələrinin güclənməsinə, Azərbaycanda vətəndaş cəmiyyətinin və hüquqi dövlət quruculuğunun sürətlənməsinə xidmət edəcəkdir! Biz - Azərbaycan Respublikasının talış əsilli vətəndaşları olaraq, ölkəmiz üçün, bu işdə öz xidmətimizi və töhfələrimizi əsirgəməyəcəyik.

Azərbaycan Talışların İctimai Şurasının təsisçiləri adından:

1. Ağayev Əli – ictimai fəal, Musavat Partiyasının üzvü;
2. Ağazadə Nəriman – arxeoloq-etnoqraf;
3. Baxşiyev Mehdi – mühəndis, Respublika Talış Mədəniyyət Mərkəzinin üzvü;
4. Əbdülov İnqilab – mədəniyyət işçisi;
5. Əbilov Ataxan – hüquqşünas, İnsan Haqları üçün Niderland Hüquqşünaslar Komitəsinin üzvü;
6. Əliyev Cabbar – tarixçi, publisist;
7. Əsgərov Oqtay - müəllim, hüquq müdafiəçisi;
8. Hacıyev Mikayıl – hərbçi, Qarabağ qazisi;
9. Heydərov Hüseynağa – mühəndis, ictimai fəal;
10. Heydərov Möhsün –mühəndis, şair;
11. Həşimov Ulduz – müəllim, ictimai fəal, Azəri-Talış İctimai Birliyinin üzvü;
12. Hüseynov Tahir – mədəniyyət işçisi, Musavat Partiyasının üzvü;
13. İbrahimov Bəhram - mühəndis, ictimai fəal;
14. Likməkani Mirfayaz – şair, Azəri-Talış İctimai Birliyin Gənclər Təşkilatının sədri;
15. Məmmədov Hilal – hüquq müdafiəçisi, "Tolışi sədo" qəzetinin baş redaktoru;


16. Nəzərov Yaşar – iqtisadçı, Azərbaycan Xalq Cəbhəsi Partiyasının üzvü;
17. Rəhimov İltifat – müəllim, Aydınlar Partiyasının üzvü;
18. Rəsuli Kenul – mədəniyyət işçisi;
19. Səfərov Mehdibəy – mədəniyyət işçisi, Azəri Talış İctimai Birliyinin sədri;
20. Şükürov Əlimərdan – mühəndis, dənizçi;
və digərləri..."

42 beynəlxalq təşkilat Azərbaycanda vəkillərin təqibinə son qoyulmasını tələb edir.

İnsan hüquqları sahəsində qırx beynəlxalq QHT birgə bəyanat yayaraq, Azərbaycanda müstəqil vəkillərə təzyiqin dayandırılmasını tələb edib.

"Biz, İnsan Hüquqları Evi təşkilatının 42 üzvü və tərəfdaşı insan hüquqları sahəsində vəkillərə, o cümlədən Şəhla Hümbətova və Elçin Sadıqova qarşı prosedurlara dərhal son qoyulmasını tələb edirik", - deyə Azərbaycan Vəkillər Kollegiyasının rəhbəri Anar Bağırovun adına ünvanlanmış müraciətdə bildirilir.

Hümbətova geniş spektr insan hüquqları pozuntuları ilə bağlı işlər üzrə böyük təcrübəyə malik məşhur Azərbaycan hüquqşünasıdır.

O, bir çox Azərbaycanlı hüquq müdafiəçisinin, o cümlədən İntiqam Əliyevin, Mehman Hüseynovun, habelə "Gəncə işi" üzrə fiqurantların maraqlarını təmsil edib.

Hümbətovanın təqibi 2018-ci ilin dekabrında Mehman Hüseynov aclıq edərkən onun hüquqlarını müdafiə etməsindən sonra güclənib.

Sadıqov da siyasi motivli işlərdə bir neçə şəxsin hüquqlarını müdafiə etmiş insan hüquqları üzrə məşhur vəkildir.

Təşkilatlarımız Vəkillər Kollegiyasının bu vəkillərin işdən kənarlaşdırılması məqsədilə bu yaxınlarda gördüyü tədbirlərdən narahatdır. Bu daimi kampaniya vəkillərin insan hüquqlarını müdafiə etməsinə mane olmağa yönəlib".

"Təşkilatınızın işləri beynəlxalq qurumlara təqdim edən, siyasi cəhətdən fəal şəxsləri müdafiə edən hüquqşünaslara qarşı repressiyalarını artan narahatlıqla qeyd edirik. Son bir neçə il ərzində Azərbaycanlı vəkillərin-hüquq müdafiəçilərinin töhmət alması, işə buraxılmalarından imtina edilməsi, lisenziyalarının dayandırılması və ya tamamilə əllərindən alınması ilə bağlı çoxsaylı hallar sənədləşdirilib.

Onlar arasında Nemət Kərimli, Elçin Namazov, Xalid Bağırov, Əlaif Həsənov, Yalçın İmanov, Əsabəli Mustafayev, Aqil Layıc, Fəxrəddin Mehdiyev, İradə Cavadova, Fuad Ağayev, İntiqam Əliyev və Ənnağı Hacıbəyli var.

Bu vəkillər fikri ifadə azadlığını müdafiə etməyə, müştərilərinə qarşı işgəncələr haqqında məlumat verməyə və siyasi məhbusları müdafiə etməyə hazır olduqlarına görə təzyiqə məruz qalıblar.

Vəkillər Kollegiyasının Hümbətovanı və Sadıqovu artıq repressiyalara məruz qalmış vəkillər siyahısına salmağa çalışmasından narahatıq.

Azərbaycan Vəkillər Kollegiyasının əməlləri hüquqşünaslıq mənəviyyatına, standartlarına, prinsiplərinə və ittifaqına ziddir. Sizi bu əməllərə dərhal son qoymağa və Hümbətovanın və Sadıqovun Kollegiyaya tamhüquqlu üzvlüyünü təmin etməyə çağırırıq", - deyə bəyanatda qeyd edilir.

Şəhid övladı Vasif Dünyamalıyev iddia edir ki, DYP-nin əməkdaşları tərəfindən şəxsi avtomobilindən 27000 manat pulu götürülüb. Dəfələrlə aidiyyatı orqanlara müraciət etsə də, onun pulunu geri qaytarmaq əvəzinə şəhid olan atasını təhqir ediblər. Ona polis əməkdaşlartı deyib ki, atanın ağlı olardı şəhid olmazdı.

Hər yerdən əli üzülən Vasif Dünyamalıyev özünü Prezident Administrasiyasının qarşısında yandırmağa cəhd edib. Lakin polis əməkdaşları onu polis maşınına əyləşdirərək bizə məlum olmayan istiqamətdə aparıblar.(kanal 13)

Deputatların aldığı məvacib - Maaş, bayrampulu, tətilpulu, pensiya… - Kimə nə qədər düşür?

Ölkə başçısının imzaladığı sərəncamla 9 fevral 2020-ci il tarixinə Azərbaycanda növbədənkənar parlament seçkisi təyin edilib. Tam tərkibdə yenilənməsi gözlənilən Milli Məclisdəki bir çox pensiya yaşını haqlamış deputatların sabiqlər sırasına qoşulacağı istisna deyil.
Araşdırma zamanı məlum olur ki, hazırda Milli Məclisin sıravi deputatlarının əməhaqqı parlamentin sədrinin maaşının 70 faizi qədər, komitə sədrlərinin maaşı 80 faizi qədər, sədr müavininin maaşı 90 faizi qədər, birinci müavinin maaşı 95 faizi qədərdir.

Hazırda sıravi deputatların əməkhaqqı 1730 manatdır. Sıravi deputatın maaşına əsasən aparılan hesablamalarımız göstərir ki, parlament sədrinin rəsmi maaşı 2 471 manat, birinci müavinin rəsmi maaşı 2 347 manat, müavinin rəsmi maaşı 2 224 manat, komitə sədrlərinin maaşı 1977 manatdır.

Milli Məclis üzvlərinə deputatlıq fəaliyyətini yerinə yetirdiklərinə görə, təxminən 730 manat əlavə müavinət təyin edilib.

Rəsmi maaşların üzərinə 730 manat müavinəti gələndə parlament sədrininin aylıq gəliri 3 201 manat, birinci müavinin aylıq gəliri 3 077 manat, müavinin aylıq gəliri 2 954 manat, komitə sədrlərinin aylıq gəliri isə 2 707 manat, sıravi deputatın aylıq gəliri 2433 manat edir.

Həmçinin, bayram günlərində (Yeni il, Novruz bayramı, Qurban bayramı, Ramazan bayramı) deputatlara 700 manat bayrampulu verilir.

Bundan başqa, deputatlar 3 aylıq yay tətili üçün rəsmi maaşlarından əlavə, 3 aylıq maaşlarının məbləği qədər məzuniyyət və istirahət pulu alırlar. Sıravi deputatlarda bu məbləğ 5190 manat (1730*3), parlament sədrində 7413 manat (2 471*3), birinci müavində 7 041 manat (2 347 *3), müavində 6672 manat (2 224 *3), komitə sədrlərində 5 931 manatdır (1977*3) .

Adının çəkilməsini istəməyən deputat əməkdaşımıza deyib ki, V çağırış Milli Məclisin bəzi üzvləri bir müddət əvvəl daha çox tətilpulu və gələcəkdə daha çox pensiya almaq üçün əlavə vəsaitlərin rəsmi maaşa daxil edilməsini təklif etsələr də, məsələyə baxılmayıb.

Məlumat üçün bildirək ki, Azərbaycan müstəqillik qazandıqdan sonra- 1995-ci ildən bu yana deputat seçilənlərin pensiya almaq hüququ var. Əvvəlkilərin isə bu hüququ yoxdur. Çünki əvvəlki seçkilərin mandat sahibləri müstəqil dövlətin deputatı sayılmırlar.

1995-ci ildən indiyədək təxminən 121 eks-deputat pensiya almaq hüququna malikdir.

"Əmək pensiyaları haqqında" qanunda göstərilib ki, qulluq stajına görə, əmək pensiyasına əlavələr aşağıdakı əmək pensiyaçılarına təyin edilir:

- Əmək pensiyası yaşına çatmış və ya bu yaşa çatanadək I qrup əlil olmuş və deputat kimi azı səlahiyyət müddətinin yarısı qədər sığorta stajı olan sabiq deputatlar (məhkəmənin qanuni qüvvəyə minmiş hökmü əsasında deputat mandatından məhrum edilmiş və Milli Məclisin, Naxçıvan Muxtar Respublikası Ali Məclisinin iclaslarında üzrsüz səbəbdən iştirak etmədiyinə görə deputat səlahiyyətlərini itirmiş deputatlar istisna olmaqla).

- Əmək pensiyasına səlahiyyət müddətində tam fəaliyyət dövrünə görə (fəaliyyət dövrü tam olmadıqda isə natamam fəaliyyət dövründəki iş stajı aylarının sayına mütənasib olaraq hesablanmaqla) Milli Məclisin fəaliyyətdə olan deputatının və Naxçıvan Muxtar Respublikası Ali Məclisinin fəaliyyətdə olan deputatının əməkhaqqının, əməkhaqqındakı sonrakı artımlar da nəzərə alınmaqla 80 faizi miqdarı ilə "Əmək pensiyaları haqqında" qanunla təyin edilən əmək pensiyasının məbləği arasındakı fərq qədər əlavə ödənilir.

Pensiya hüququna malik olan eks-deputatlara Milli Məclisinin fəaliyyətdə olan deputatının maaşı qədər pensiya verilir:

"Çünki onlara deputatıq dövründə verilən əlavələr sığorta stajına yazılır. Pensiya hüquqna malik olan zaman isə həmin əlavələr pensiyaya əlavə edilir".

"Azərbaycan Respublikası Milli Məclisi deputatının statusu haqqında" Qanunun 24-1 maddəsinə görə, vəfat etmiş deputatın və sabiq deputatın ailə üzvlərinin pensiya təminatı aşağıdakı kimi müəyyən edilir:

- Deputat və sabiq deputat vəfat etdikdə onların ailə üzvlərinin pensiya təminatı "Əmək pensiyaları haqqında" Qanuna uyğun olaraq həyata keçirilir.

Qanunun 30-cu maddəsinə əsasən, səlahiyyət müddəti qurtardıqdan sonra sabiq deputat işə düzələnədək 1 il müddətində hər ay deputatın aylıq vəzifə maaşının 80 faizi məbləğində qanunvericiliklə müəyyənləşdirilmiş qaydada müavinət alır.

Məhkəmənin qanuni qüvvəyə minmiş hökmü əsasında deputat mandatından məhrum edilmiş və Milli Məclisin iclaslarında üzürsüz səbəbdən iştirak etmədiyinə görə deputat səlahiyyətlərini itirmiş deputatlar istisna olmaqla, pensiya yaşına çatmış və ya bu yaşa çatanadək əlil olmuş sabiq deputatın pensiya təminatı "Əmək pensiyaları haqqında" Qanuna uyğun olaraq həyata keçirilir.

Pensiya yaşına çatmış deputatın iş stajının hesablanması zamanı səlahiyyət müddəti onun ümumi, xüsusi və fasiləsiz iş stajına daxil edilir.(modern.az)

7 -dən səhifə 1515
Top
JoomlaLock.com All4Share.net