Arzu Xanim

Arzu Xanim

Email: Bu email ünvanı spambotlardan qorunur. Onu görmək üçün JavaScripti qoşmaq lazımdır.

16 yanvar Şəhid Rövşən Əbdülhüseyn oğlu Abdullayevin doğum günüdür.

Vetenugrunda.az bu gün oxucularına Azərbaycanın Milli Qəhrəmanını xatırladacaq.

Rövşən Abdullayev 1969-cu ilin 16 yanvarında Lerik rayonunda doğulub. Orta təhsilini Astara şəhər 1 saylı orta məktəbdə başa vurduqdan sonra ailəsi ilə birlikdə Lənkərana köçüb. 

O, 1987-ci ildə Sankt-Peterburq Ali Hərbi-Siyasi məktəbinə daxil olub. 1991-ci ildə ali məktəbi əla qiymətlərlə bitirən gənc leytenantın təyinatı Rostov şəhər Daxili İşlər Şöbəsinə verilib.

O, Azərbaycana qayıdan kimi DİN-in əməkdaşı olaraq daxili qoşunların tərkibinə qatılır. Gənc zabit bir müddət sonra Zəngilana göndərilir. Rövşən 70 nəfərdən ibarət tağımın komandiri təyin edilir. Onun başçılıq etdiyi tağım göstərdiyi şücaətə görə cəbhədə ad çıxarır. 

R. Abdullayevin köməkliyi ilə düşmənin Qafan rayonunda yerləşən obyektləri məhv edilib. 13 sentyabr 1993-cü il Rövşənin son döyüşü olub. Erməni faşistləri Zəngilan rayonunun Qazançı kəndinə hücum edir. O, döyüş yoldaşları ilə "QAZ-66" markalı avtomobilə əyləşib Qazançıya yollanır, onlar kəndin yaxınlığında düşmənin PDM-i və piyadaları ilə üzbəüz çıxr, güclü atəşə maruz qalan vətənimizin igid oğulları ölüm -dirim savaşına girir. Rövşən yoldaşlarına meşəyə çəkilməyə əmr edir, özü isə ağır yaralansada silahı yerə qoymur. O, son nəfəsinədək vətəni, dostları uğurunda döyüşür və Şəhid olur.

R.Abdullayev Şəhid olanda subay idi. Lənkəran şəhər qəbristanlığında dəfn edilən Şəhidimizin Lənkəran şəhərində abidəsi qoyulub.  Adına Lerikdə mədəniyyət evi və küçə var. 

Şəhid olduqdan iki il sonra Rövşən Əbdülhüseyn oğlu Abdullayev "Azərbaycanın Milli Qəhrəmanı" adına layiq görülüb.

Ruhu şad olsun!

Onların 12 illik həbs müddəti bitib.

13-18 yanvar 2007-ci ildə "Səid Dadaşbəyli işi" üzrə tutulanlardan Mikayıl Qərib oğlu İdrisov və Emil Nurəddin oğlu Möhbalıyev həbs müddətləri bitdiyi üçün bu gün azadlığa çıxıb. Onların hər biri Bakı Ağır Cinayətlər Məhkəməsinin (sədrlik edən Ənvər Seyidov) 10 dekabr 2007-ci il tarixli hökmü ilə 12 il müddətinə azadlıqdan məhrum edilmişdi.

Xatırladaq ki, 13-18 yanvar 2007-ci ildə "Səid Dadaşbəyli işi" üzrə təxminən 30 nəfər həbs edilib və tutulanlar "NİMA" (Mehdi Seyid əz-Zamanın Şimal Ordusu) adlı radikal dini qruplaşma yaradaraq İranın xüsusi xidmət orqanlarına casusluq etməklə dövlət əleyhinə cinayətlərin törədilməsində ittiham olunublar.

Bir müddət sonra həbs edilənlərin bəziləri Milli Təhlükəsizlik Nazirliyinin təcridxanasında saxlanılan 11 nəfərin əleyhinə izahat vermək şərti ilə azadlığa buraxılıblar. Həbslərin ilkin mərhələsindən başlayaraq ciddi qanun pozuntusuna yol verilib. İttiham olunanların mənzillərində axtarış aparılması barədə məhkəmə qərarları olmadan Milli Təhlükəsizlik Nazirliyinin əməkdaşları güc tətbiq edərək evlərə giriblər. Həbs edilənlərin valideynləri və qohumlarının etirazlarına baxmayaraq, MTN əməkdaşları nümayişkaranə şəkildə həbsi əsaslandırmaq üçün silah və lazım olan başqa "maddi sübut"ları mənzillərə qoyublar. Bu hərəkətlər cinayət-prosessual qanunvericiliyin kobud şəkildə pozuntusudur. Bununla yanaşı, həbsin ilk günlərində saxlanılanlara vəkilləri ilə əlaqə yaratmaq imkanı verilməyib.

Həbs edilənlər istintaq zamanı məhkəməyə qədər – 13 yanvar 2007-ci ildən 11 dekabr 2007-ci ilədək MTN-nin təcridxanasında təkadamlıq kameralarda saxlanılıblar. Onlar davamlı olaraq döyülüb, yatmaqdan, yeməkdən və sudan məhrum ediliblər. Eyni zamanda həbs edilənlərə psixotrop maddələr verilib. Onları istintaqa gərək olan etiraf izahatları verməyəcəkləri təqdirdə azadlıqda olan qohumlarına işgəncə veriləcəyi ilə hədələyiblər.

Vəhşicəsinə edilən işgəncə zamanı Emin Məmmədov adlı məhbus 2007-ci ilin mart ayında ölüb. E.Məmmədovun ölümünün səbəbləri barədə tibbi arayış var. Ancaq E.Məmmədovun ölümü bir neçə ay ərzində valideynlərindən və ictimaiyyətdən gizlədilib. Onun ailəsi E.Məmmədovun ölümü ilə bağlı hüquq müdafiəçilərinə müraciət edəcəkləri, ictimaiyyət qarşısında öldürülmüş şəxsin taleyi ilə bağlı məsələ qaldıracaqları halda yeni repressiyalarla üzləşəcəkləri ilə hədələnib.

Vəkilin məhbus E.Məmmədovun saxlandığı yer barədə sorğusuna cavab verən MTN bildirilib ki, bu adam haqqında heç bir məlumatları yoxdur və E.Məmmədov MTN-də heç bir zaman olmayıb. MTN təcridxanasında işgəncələrə məruz qalaraq həyatını itirən E.Məmmədov məhkəmə prosesləri zamanı da xatırlanmayıb. E.Məmmədov məhkəmə və ictimaiyyət üçün izsiz yoxa çıxıb.

Məhkəmə prosesləri qapalı keçirilib və həbs edilənlərin ailə üzvləri proseslərə buraxılmayıb. CPM-in 200-cü maddəsinə əsasən dövlət sirlərinin yayılmasının qarşısını almaq məqsədilə məhkəmə prosesləri qapalı keçirilə bilər. Lakin cinayət işində dövlət sirri barədə hər hansı qeyd yoxdur və CPM-in 200-cü maddəsinə istinad edilərək məhkəmə proseslərinin qapalı keçirilməsi əsaslandırılmayıb. Bu cinayət işi üzrə məhkəmə proseslərinin qapalı keçirilməsi qanuna zidd idi.

Məhkəmə prosesi zamanı ittiham edilənlər onlara qarşı irəli sürülən ittihamları qəbul etməyib. Eyni zamanda, həbs müddətində işgəncələrə və başqa qanunazidd hərəkətlərə məruz qaldıqlarını bildiriblər. Məhkəmə prosesi zamanı məlum olub ki, terror təşkilatı yaratmaqda günahlandırılanların əksəriyyəti həbsə qədər bir-birlərini tanımayıblar. Həmçinin, irəli sürülən ittihamların heç biri məhkəmə araşdırması zamanı sübuta yetirilməyib və proses ittiham tərəfinin istəyinə uyğun şəkildə yekunlaşıb.

Bakı Ağır Cinayətlər Məhkəməsinin (sədrlik edən Ənvər Seyidov) 10 dekabr 2007-ci il tarixli hökmü ilə Səid Dadaşbəyli 14 il, Rəşad Əliyev 14 il, Ceyhun Əliyev 14 il, Fərid Ağayev 13 il, Samir Qocayev 13 il, Bəybala Quliyev 13 il, Cahangir Kərimov 13 il, Rasim Kərimov 13 il, Emil Möhbalıyev 12 il, Mikayıl İdrisov 12 il müddətinə azadlıqdan məhrum ediliblər. Bakı Apellyasiya Məhkəməsi 25 fevral 2008-ci ildə, Ali Məhkəmə isə 2008-ci ilin payızında hökmü qüvvədə saxlayıb.

1 saylı Bakı İstintaq Təcridxanasında saxlanılan bloger Mehman Hüseynova yanvarın 15-də ailə üzvləri ilə görüşə icazə verilməyib.

Bu barədə Mehman Hüseynovun məcburi mühacirətdə olan qardaşı Emin Hüseynov bildirib.

Onun sözlərinə görə, atası özünü pis hiss etdiyinə görə görüşə qardaşının həyat yoldaşı Ofeliya Hüseynova gedib. Lakin ona görüş verməyərək deyiblər ki, ancaq Mehman Hüseynova atası ilə görüş veriləcək.

Ofelya Hüseynova sənədlərini, o cümlədən blogerin qardaşı ilə nikah sənədini, Mehman Hüseynovun təcridxanadan onun telefon nömrəsinə zəng etməsinə dair sübutları təqdim etsə də görüş verilməyib. Ofelya Hüseynovanın blogerə gətirdiyi geyim, süd və yoqurtu qəbul ediblər.

Qardaşının fikrincə, Mehmanı qəsdən təcrid edirlər, artıq 21-ci gündür davam etdiyi aclığı dayandırması üçün ona təzyiq göstərirlər.

"Eyni zamanda hakimiyyət Mehmanın aclığı davam etdirməsi haqda məlumatın qarşısını almağa və hamını inandırmağa çalışır ki, aclıq dayandırılıb", Emin Hüseynov bildirib.

Həbsdə olan bloger Mehman Hüseynova qarşı 2018-ci il dekabrın 26-da yeni cinayət işi başlanılıb. O, 14 saylı cəzaçəkmə müəssisəsinin əməkdaşına xəsarət yetirməkdə ittiham olunur. Bloger ittihamın yalan və böhtan olduğunu bildirib.

O, dekabrın 26-dan etiraz olaraq quru aclığa başladığını bəyan edib. Hazırda bloger maye süd məhsulları içsə də qida qəbulundan imtina etməkdə davam edir.

Mehman Hüseynov 2017-ci il martın 3-də 2 il azadlıqdan məhrum edilib. O, Nəsimi Rayon Polis İdarəsinin rəisi Musa Musayevin xüsusi ittiham qaydasında qaldırdığı iddia əsasında cəzalandırılıb – polisə böhtan atmaqda təqsirli bilinib.

Amerikanınsesi.com

Cəbhəçilərə "bandotdel"də verilən işgəncələr məhkəmədə açıqlandı

Babək Həsənov: "Tok buraxan kimi yıxıldım, biri ayaqlarımın, biri də belimin üstünə çıxdı"

"Bizə verilən işgəncə metodları əsasən, yerə yıxıb, belimdə xəsarət olan hissəni, boynumu təpikləmək, bədənimizə tok verməkdən ibarət idi…"

Bunlar Qarabağ qazisi, AXCP Ali Məclisinin həbsdə olan üzvü, partiyanın Nərimanov şöbəsinin sədr əvəzi Babək Həsənovun sözləridir. O bu sözləri yanvarın 15-də məhkəmədə ifadə verərkən danışıb.

Babək Həsənov və daha dörd nəfərin – AXCP Rəyasət Heyətinin üzvü Aqil Məhərrəmli, partiyanın Gənclər Komitəsinin Məclis sədri Ruslan Nəsirli, Gədəbəy rayonunun sabiq icra başçısı Saleh Rüstəmli və onun qardaşı oğlu Vidadi Rüstəmlinin işinə Bakı Ağır Cinayətlər Məhkəməsində Eldar İsmayılovun sədrlik etdiyi hakimlər kollegiyası baxır.

Yanvarın 15-də məhkəmədə vəkillər Saleh Rüstəmlinin ittihamda yazıldığından fərqli olaraq, qardaşı və onun həyat yoldaşıyla birlikdə olarkən saxlandığını bildirərək, onların əlavə şahid qismində dindirilməsi, Vidadi Rüstəmlinin ev dustaqlığına buraxılması barədə vəsatətlər qaldırıblar. Vəsatətlərin heç biri təmin olunmayıb.

Vəkillər deyiblər ki, istintaq çoxdan başa çatıb, artıq məhkəmə gedir, hələ də təqsirləndirilən şəxslərin yaxınlarıyla görüşmək hüququ məhdudlaşdırılır. Hakim bildirib ki, məhkəmənin hazırlıq iclasından bir gün sonra Bakı istintaq təcridxanasına məktub göndərib, onların telefon danışığı və görüş hüququ ilə bağlı məhdudiyyətin aradan qaldırılması istənilib.

İTTİHAMDA 770 MİN MANATDAN SÖHBƏT GEDİR

Daha sonra prokuror Əli Əliyev ittiham aktını elan edib. İttihamda təqsirləndirilən şəxslərlə yanaşı, AXCP sədri Əli Kərimli, "Azadlıq" qəzetinin baş redaktoru Qənimət Zahid, partiya fəallarından Eltac Əlisoy və başqalarının adları hallanır. Onların mütəşəkkil dəstə yaradıb, cinayət yoluyla əldə olunan pulları leqallaşdırdıqları iddia olunur. İttihama əsasən, Saleh Rüstəmli qardaşı oğlu və digər təqsirləndirilən şəxslər vasitəsilə pullar göndərib. İttihamda ümumilikdə 770 min manatdan söhbət gedir.

Saleh Rüstəmli və qardaşı oğluna əlavə narkotik ittihamı da verilib.

Məhkəmə önünə çıxarılan şəxslərin heç biri özünü təqsirli bilməyib. Onlardan yalnız Babək Həsənov ifadə verib. İlk növbədə hakimlərdən məhkəmənin daha böyük zalda keçirilməsini istəyən Babək Həsənov deyib ki, daha çox adama bu məhkəmə prosesində iştirak edib, həqiqəti öz gözü ilə görməyə şərait yaradılmalıdır.

Babək Həsənov deyir ki, taksi fəaliyyətilə ailəsini dolandırır. Mayın 25-də metronun "Nərimanov" stansiyasının yaxınlığındakı binalardan birinin həyətində sərnişini düşürəndən sonra iki maşından düşən 7-8 nəfər mülki geyimli ona hücum edib.

Dörd nəfər avtomobilə daxil olaraq, onu çıxarıb, öz maşınlarından birində əyləşdirib. Bir qədər gətirəndən sonra metronun yaxınlığında təxminən 15 dəqiqə saxlayıb, kiminləsə danışıblar. Sonra deyilib ki, Yeni Günəşli qəsəbəsinə – yaşadığı evdə axtarış aparmağa gedirlər:

"Mənim maşınımı da başqa biri sürürdü. O maşın indi də Mütəşəkkil Cinayətkarlığa Qarşı Mübarizə İdarəsinin həyətindədi. Günəşliyə çatanda qəsəbənin müxtəlif yerlərində 10-15 dəqiqə dayandılar. Yenə kimlərləsə danışırdılar. Mən etiraz edirdim ki, vəkil olmasa, axtarışa imkan verməyəcəm. Günəşlidə bir xeyli vaxt keçirəndən sonra məni idarəyə gətirdilər. Sonradan bilmişəm qəsəbədə vaxt keçirdikləri müddətdə bizim evdə axtarış gedibmiş".

Babək Həsənovun sözlərinə görə, idarədə ondan telefonunu açmaq üçün kodu istəyiblər, o isə verməkdən imtina edib. Deyib ki, ancaq vəkilinin iştirakıyla telefonuna baxış keçirilməsinə icazə verəcək:

"Məni bir otağa apardılar, 7-8 nəfər mülki geyimli vardı. Bir-birini adlarıyla çağırmırdılar ki, bilməyək. Otaqda xüsusi işgəncə aparatları vardı. Əllərimi qandallamışdılar, biri baş barmaqlarıma "şnur" bağladı. Dedilər ki, "sənə göstərəcəyik burada kodu verməmək, danışmamaq necə olur". Bunlara göstəriş verənlərdən biri müstəntiq Sənan Paşayev idi".

"TOK BURAXAN KİMİ YIXILDIM"

Babək Həsənov deyir ki, ikinci qrup Qarabağ əlili, onurğasında problem olduğunu həmin vaxt onlara deyib. Amma nəzərə almayıblar. Barmaqlarına bağlanan naqilə cərəyan buraxıblar: "Tok buraxan kimi yıxıldım, bir nəfər ayaqlarımın, biri də belimin üstünə çıxdı. Eyni zamanda, hərəsi təxminən 3 dəqiqə olmaqla, 5 dəfə tok verdilər. Hər dəfəsindən sonra soruşurdular ki, danışacaqsan? "Yox" cavabından sonra davam etdirirdilər. Axırıncıdan sonra biri dedi ki, "toku artırın, qoy ürəyi partlasın". Artıranda sanki beynim, damarlarım dağılırdı. Ona görə məcbur olub telefonun kodunu verdim…"

Təqsirləndirilən AXCP funksioneri deyir ki, Vidadi Rüstəmlidən zərfin içində pul alıb Əli Kərimliyə çatdırması, həmin vəsaitlərin partiyanın maliyyələşməsinə sərf olunması barədə ifadələrə də işgəncə altında imza atıb:

"Saleh Rüstəmlini ilk dəfə Cəmil Həsənlini Gədəbəyə deputat yoldaşı Nizami Quliyevin övladının toyuna aparanda orada görmüşəm, heç kim olduğunu da bilməmişəm. Vidadi Rüstəmli ilə üç dəfə görüşmüşəm. Zəng eləyib, 500, 600 və 500 olmaqla, cəmi 1600 manat üç dəfə pul götürüb Əli Kərimliyə çatdırmışam. Vəssalam".

Babək Həsənov əlavə edib ki, ona verilən işgəncələrlə bağlı şikayətini yerli məhkəmələr təmin etməyib və iş hazırda Avropa Məhkəməsindədir.

Məhkəmə yanvarın 22-də davam edəcək. 

5 -dən səhifə 1241
Top
JoomlaLock.com All4Share.net