Prezident İlham Əliyevin Şuşa səfəri dünya mediasında: "Şuşa bizi gözləyirdi, biz də gəlmişik"

Prezident İlham Əliyevin Şuşa səfəri dünya mediasında: "Şuşa bizi gözləyirdi, biz də gəlmişik"

Ailəsi ilə birgə Şuşa səfərində olan ölkə başçısı İlham Əliyev Cıdır düzündə tonqal yandırıb.

Vetenugrunda.az-ın verdiyi xəbərə görə, bu görüntüləri Azərbaycanın Birinci vitse-prezidenti Mehriban Əliyeva özünün instaqram səhifəsində paylaşıb. 

Daha sonra ölkə başçısı Azərbaycan xalqını Şuşadan Novruz bayramı münasibətilə təbrik edib.

"Şuşa bizi gözləyirdi, biz də gəlməli idik və gəlmişik" deyən ölkə başçısı xalqa xoş arzularını çatdırıb: 

Dövlət başçısı bildirib ki, 2004-cü ildən başlayaraq hər il Azərbaycan xalqını Novruz bayramı ilə təbrik edərkən doğma torpaqlarımıza qayıdacağımızı deyib: "Deyirdim ki, biz ərazi bütövlüyünü bərpa edəcəyik, deyirdim ki, Novruz bayramını bizim Qarabağ torpaqlarında işğaldan azad edəndən sonra qeyd edəcəyik. Və bu gün gəldi, bu gün biz Novruz bayramını Şuşada qeyd edirik. Bu tarixi hadisədir, bu böyük xoşbəxtlikdir. Allah Azərbaycan xalqının dualarını eşitdi.

Hər il Novruz bayramı ərəfəsində hamımız fikirləşirdik, bir-birimizə deyirdik ki, inşallah, gələn il Novruz bayramını Qarabağda, Şuşada qeyd edəcəyik. Və bu gün gəldi, 28 ildən sonra biz Şuşaya qayıtdıq. Novruz bayramını Cıdır düzündə qeyd edirik.

Noyabrın 8-də Şuşanın azad edilməsi ilə bağlı müjdəni Azərbaycan xalqına verərkən demişdim ki, Şuşa sən azadsan! Bu gün azad Şuşada biz öz milli bayramımızı, Novruz bayramını qeyd edirik. Şuşa 28 il mənfur düşmən tərəfindən dağıdılırdı.

Şuşanın tarixi siması dağıntılara məruz qalırdı. Düşmən Şuşanı erməniləşdirmək istəyirdi. Şuşadan Azərbaycan xalqının irsini silmək istəyirdi, ancaq buna nail ola bilmədi. Ancaq əyilmədi, sınmadı, öz ləyaqətini qorudu. Bu gün Şuşada olarkən bir daha bunun şahidi oluruq. Şuşa bizi gözləyirdi, biz də gəlməli idik və gəlmişik. Ancaq gəlmək üçün güc toplamalı idi, hazırlıq işləri aparmalı idik".

Qeyd edək ki, ölkə başçısının Şuşa səfəri haqqında dünya mediası yazıb. Türkiyənin nüfuzlu media orqanları prezidentin Cıdır düzündə yandırdığı tonqalın şəkillərini paylaşıb.