Dilqəm Əsgərov: "Həsənin necə öldürülməsini Paşinyanın dostu Şahbaz Quliyev yaxşı bilir"

Dilqəm Əsgərov: "Həsənin necə öldürülməsini Paşinyanın dostu Şahbaz Quliyev yaxşı bilir"

Bu gün Kəlbəcərdə ermənilər tərəfindən öldürülən Şəhid Həsən Həsənovun doğum günüdür.

 H. Həsənovun necə öldürülməsi ilə bağlı Dilqəm Əsgərova ünvanlanan suala belə cavab verib: "Bunu Şahbaz Quliyevdən soruşun. Allah Həsənə rəhmət eləsin. Həsənin necə öldürülməsini Nikol Paşinyanın dostu Şahbaz Quliyev yaxşı bilir. Bunu ondan soruşun. Şahbaz deyir ki, Həsən guya yaralı halda gəlib yanımdan keçdi. Haram olsun Şahbaza, o, nə üzlə Həsənin qəbrinin üstünə gedib. Mən Həsənin vurulduğunu görməmişəm. Mən indi Qubadayam. Çox təəssüf ki, Həsənin doğum günündə onun qəbrini ziyarət edə bilmədim".

Məsələ ilə bağlı Şahbaz Quliyevlə də əlaqə saxlanılıb. Lakin o, danışmaq istəmədiyini bildirib: "Dilqəm haqqımda nə deyir özü bilər. İndi bu haqda heç nə danışmaq istəmirəm. Buna imkanım da yoxdur. Sonra nə vaxtsa görüşüb danışarıq".

Həsən Həsənovun qardaşı Nail Həsənov isə bunları deyib: "Bu gün Həsənin məzarını ziyarətə Şahbaz da gəlmişdi. Şahbazla Dilqəm bizə ziddiyyətli məlumatlar verirlər. Şahbaz deyir ki, mən tutulandan üç gün sonra Həsən Şəhid olub. Dilqəm də deyir ki, mən HəsəninŞəhid olmasını görməmişəm. Burda məcburuq ki, Dilqəmin üzərində dayanaq.

Dilqəm özü deyirdi ki, Həsənlə bir yerdəydik. Onunla görüşdük, amma 15-20 dəqiqənin içində bütün bunları danışmaq mümkün deyildi. Dilqəm deyirdi ki, Həsəni Zod qızıl yatağı tərəfdə vurdular. Amma ermənilər yazırdı ki, Xankəndində Həsənin meyitini Şahbaza və Dilqəmə göstərdik. Onlar hər ikisi meyiti tanıdı. Amma indi ikisi də deyir ki, Həsənin meyitini görməmişik. Yəni bu cür ziddiyyətli məsələlər var".

N. Həsənov deyib ki, hələ indiyə kimi Şəhid qardaşının sığorta pulunu ala bilməyiblər: "Biz hələ indiyə kimi Həsənin sığorta pulunu ala bilməmişik. Yeddi ildir ki, get-gəldəyik. Bir də ölkə başçımızdan xahişimiz odur ki, Həsəni bu qəhrəmanlığına görə medalla təltif etsin". (moderator.az)