Karantin rejimi 2 həftəlik sərtləşdirilir, sms-icazələr bərpa olunur

Karantin rejimi 2 həftəlik sərtləşdirilir, sms-icazələr bərpa olunur

Nazirlər Kabineti yanında operativ qərargahın KİV nümayəndələri üçün növbəti brifinqi keçirilir.

Bu dəfəki mətbuat konfransında TƏBİB-in İdarə Heyətinin sədri Ramin Bayramlı, Xarici İşlər Nazirliyinin Mətbuat xidməti idarəsinin rəisi Leyla Abdullayeva, Milli Məclisin Səhiyyə komitəsinin sədrinin müavini Rəşad Mahmudov iştirak edib. Tədbirdə pandemiya ilə bağlı ölkədəki son vəziyyət haqda məlumat verilib.

21 iyundan 2 həftə ərzində ciddi karantin rejimi tətbiq olunacaq

SMS xəbərdarlıq və xüsusi icazə şəklində evdən çıxmaq mümkün olacaq.

21 iyun saat 00:00-dan 5 iyul saat 6:00-dək ciddi karartin rejimi tətbiq olunacaq

Leyla Abdullayeva deyib ki, Bakı, Sumqayıt, Cəlilabad, Abşeron, Gəncə şəhərləri üzrə ciddi karantin rejimi tətbiq ediləcək.

Metro işləyəcək

Bildirilib ki, Bakı metrosu xüsusi karantin rejimi müddətində fəaliyyətini davam etdirəcək.

L.Abdullayeva məlumat verib ki, bulvar və parklara giriş də məhdudlaşdırılmayacaq.

Bərbərxana və gözəllik salonları bağlanacaq

Bunu da Abdullayeva bildirib. Əlavə edib ki, otellərin fəaliyyəti, beynəlxalq səfərlər, yas mərasimləri, tədbirlər, təhsil müəssisələrində fəaliyyət qadağası qüvvədə qalır.

65 yaşdan yuxarı insanların evdən çıxmasına qadağa qoyulmur. Lakin tövsiyə olunur ki, mümkün qədər evdə qalsınlar. Sabah bunlar barədə ətraflı məlumat veriləcək.

Açıq havada idman yarışlarının keçirilməsinə qadağa qoyulub

Abdullayeva brifinqdə məlumat verib.

O bildirib ki, 21 iyun saat 00:00-dan 5 iyul saat 06:00-dək ölkədə tətbiq olunacaq ciddi karantin rejimi ilə əlaqədar yarışların təşkili dayandırılıb.

İmtahanlar təxirə salınacaq

Abdullayeva bildirib ki, buraxılış və qəbul imtahanları təxirə salınacaq. Yalnız Naxçıvan Muxtar respublikası ərazisində ola bilsin ki, bu imtahanlar keçirilsin. Bununla bağlı məlumat veriləcək.

5 min aktiv xəstə var

Bayramlı isə bildirib ki, Azərbaycanda koronavirusla əlaqədar icra olunan testlərin sayı 400 mindən çoxdur.

Hazırda 5 000 nəfərə yaxın aktiv xəstə var. 157 nəfər reanimasiya şöbəsində müalicə alır, 30 nəfəri süni tənəffüs aparatına qoşulmuş vəziyyətdədir.

Sərhədlər avqustun 1-dək bağlı qalacaq

L. Abdullayeva bildirib ki, avqustun 1-dək dövlət sərhədlərinin bağlı qalması qüvvədədir.

Xüsusi karantin rejimində nəqliyyat işləyəcək

Abdullayeva qeyd edib ki, iş rejimi ilə bağlı özəl və dövlət sektorunda çalışanlar şəxsi avtomobillərdən istifadə edə biləcəklər.

Bu məsələ Operativ Qərargahda müzakirə olunub və sabah geniş məlumat veriləcək. Xüsusi karantin rejimi günlərində metro ilə yanaşı, digər ictimai nəqliyyat növləri də fəaliyyət göstərəcək.

Sərt karantin vacibdir

Bayramlı bildirib ki, yenidən sərtləşmə qərarı verilməsinə səbəb ölkədəki epidemioloji vəziyyətdir. Yoluxmalar artır və ölkədə situasiya ürəkaçan deyil.

Qərarlar çox ciddi statistik rəqəmlər əsasında aparılan geniş təhlillər nəticəsində verilib. Həftəsonu tətbiq edilən məhdudiyyətlər imkan verdi ki, uzun müddətli məhdudiyyətlərin tətbiqi üçün vaxt qazanaq. Bu məhdudiyyətlər aprel ayında tətbiq edilən məhdudiyyətlərə bənzərdir.

Dünya ölkələrində koronavirusa yoluxmalar artır

Bayramlı deyib ki, Azərbaycanda da vəziyyət ürəkaçan deyil.

"Bizim A, B və C variantlarımız var. Son iki həftədə tətbiq olunan məhdudiyətlərin nəticə verməsinə gəldikdə, bu addımlar xarici ölkələrin təcrübəsinə əsasən atılıb. Bu, bizə uzunmüddətli məhdudiyyətlərin tətbiqinə vaxt qazanmağa imkan verdi”.

O əlavə edib ki, məhdudiyyətlər aprel ayında tətbiq olunan məhdudiyyətlərə bənzəyir. Aprel ayında səhiyyə strukturları xəstəliklə mübarizəyə tam hazır deyildi. Doğrudur, yetərincə çarpayı sayı vardı. Lakin xəstəliyin nə dərəcə artması, əlavə çarpayı sayına ehtiyac olması, laboratoriya, avadanlıq təminatları həyata keçirildi. Xəstələrin 15 faizi adətən, reanimasiya üçün nəzərdə tutulur.

R. Bayramlının sözlərinə görə, xəstəxanaların oksigen sistemləri, generatorlar bu qədər xəstəyə hesablanmayıb. Xəstəxanaların bir qismində generatorlar deyil, oksigen balonları istifadə olunurdu. Bununla əlaqədar generatorlar alınıb. Modul tipli xəstəxanalar yaradılıb, 7 minə qədər çarpayı hazırlanıb, ancaq bu gün 5 minə qədər xəstə var, virusa yoluxma sürətlə baş verir. Yeni yoluxanlarla sağalanlar arasında fərq artır, tibb müəssisələrinin üzərinə böyük yük düşür.

Azərbaycanda ölüm faizi aşağıdır

Bayramlı söyləyib ki, dünya ölkələrində koronavirusa yoluxanlar arasında 4-18 faiz ölüm var. Azərbaycanda isə ölüm faizi daha aşağıdır. Bu, səhiyyə sisteminin hazırlığı ilə bağlıdır. Almaniya, İtaliya kimi ölkələrdə yenidən yoluxma artır.

Türkiyədə bir sıra şəhərlərdə belə maskanın tətbiqi tələbi qoyulub. Çində yenidən sərt tədbirlər tətbiq olunur. Azərbaycan dövlətinin siyasətinin mərkəzində insanlarımızın sağlamlığı dayanır. Xəstəliyin qarşısının alınması peyvənd və dərmanın tapılması ilə mümkün olacaq.

Bu gün də bunlar yoxdur. İndiyə qədər 10-a yaxın mərkəzdə ciddi tədqiqatlar aparılır, iki mərkəzin tədqiqatı üçüncü mərhələyə keçib. Ancaq peyvənd tapılsa da, ola bilər ki, hər il virusun yeni ştamplarına görə yeni peyvəndlərə ehtiyac olacaq. Bir ehtimal da var ki, virus mutasiya olunsun və həyatımızdan itsin. Ancaq bu, o qədər də real deyil.

Təhlükə ciddidir

TƏBİB sədri bildirib ki, təhlükə çox ciddidir. Əgər xəstəlik dalğavarı deyil, yüksələn xətlə inkişaf edərsə, səhiyyə sistemi bunun öhdəsindən gələ bilməz, ölümlər daha çox olar.

Yas yerlərində yoluxanlar çoxdur

Bayramlı bildirib ki, qaydalara əməl etmək baxımından aparılan müşahidələr göstərir ki, vəziyyət heç də ürəkaçan deyil. Hələ də qaydalara əməl etməyən vətəndaşlarımız var. Küçələrdə hələ də simptomları olmayan və zəif olan vətəndaşlar gəzir. Onlar maskasız gəzdikdə başqa insanları da yoluxdururlar. Hələ də yas yerlərinə kütləvi toplaşanlar var. Yas yerlərində kütləvi yoluxmalar haqqında ciddi epidemioloji nəticələr müşahidə edilir. İctimai nəqliyyatda qoruyucu vasitələrin, maskanın istifadə olunmaması ilə bağlı kifayət qədər yoluxma halı mövcuddur.

Evdə müalicə olunanlar üçün

Bayramlı bildirib ki, virus qanın laxtalanma sisteminə çox ciddi təsir göstərir.

O əlavə edib ki, artıq modul tipli xəstəxanalara xəstə yatırılmasına başlanılıb. Poliknik müşahidə altında xəstələrin evdə müalicə olunması ilə bağlı hazırlıq işləri yekunlaşır. Bununla bağlı bir sıra ölkələrin təcrübəsindən istifadə ediləcək. E-təbib mobil tətbiqi hazırlanır və bu sistemlə evdə müalicə olunan xəstələri izləmək mümkün olacaq.

Evdə müalicə olunan şəxslər 12 saatdan bir sorğu ediləcək. Qərara əsasən müalicələrinin ev və ya xəstəxana şəraitində davam etdirilməsi barədə bundan sonra qərar qəbul ediləcək.

Bayramlı bildirib ki, deksametazondan nəzarətsiz istifadə etmək olmaz. Deksametazon yalnız ağır xəstələrə tətbiq edilir. Deksametazondan istifadə yeni deyil.

Çimərliklərdən istifadə də qadağan edilir

Bayramlı bildirib ki, karantin rejimi sərtləşdirilən bölgələrdə çimərliklərdən istifadə qadağan olunacaq. İnsanların sıx toplaşmaması baxımından saatları tənzimləməklə icazə mümkün olacaq. Yəni necə ki, SMS icazə ilə alış-verişə çıxdığımız müddət müəyyən olunurdu, həkimə gedib-gəlmək müəyyən olunurdusa, bu çərçivədə yanaşılacaq. Bu istiqamətdə sabah əlavə məlumatlar veriləcək.

Koronavirus testi 40 manatdı

Bayramlı bildirib ki, hazırda 25-ə yaxın laboratoriyada koronavrusla bağlı testlər keçirilir. Ölkədə test ehtiyatı kifayət qədərdir. Test ehtiyatı tender qaydalarına uyğun əldə edilib. Alınan bütün testlər Almaniya istehsalıdır. Testin maya dəyəri 40 manat civarındadır. Bura mütəxəssislərin əməyi daxil deyil.

Rəşad Mahmudov isə əlavə edib ki, bu dərmandan nəzarətsiz istifadə əksinə ağır xəstələrin sayını artıra bilər: "Bu gün apteklərdə deksametazonun tükənməsi xəbərini verdilər. Bu, yolverilməzdir. Dərmandan özbaşına istifadə etmək olmaz".

Vətəndaşlar məsuliyyətli olmalıdırlar

Rəşad Mahmudov isə çıxışında bildirib ki, hələ də Azərbaycan cəmiyyətində həqiqətən koronavirusun olub-olmaması barədə suallara rast gəlinir. "Hər bir səhiyyə sisteminin bəlli bir potensialı var. Biz cəmiyyət olaraq məsuliyyətli olmalıyıq. Dünyada bu problemin həll olunmasına inanmalıyıq"-o bildirib.

Bəhram Bağırzadənin vəziyyəti

Mahmudov bildirib ki, infeksiya olduğu halda Bəhram Bağırzadəyə orqan köçürülməsi mümkün deyil. Dünyanın heç bir ölkəsində virusa yoluxan xəstəyə orqan köçürülmür. Xəstə sağalandan sonra orqan köçürülməsi müzakirə oluna bilər. (virtualaz.org)